नवलपरासी पश्चिम ,चैत २३ गते । बुटवल-नारायणगढ सडक खण्ड अन्तगत दाउन्ने क्षेत्रमा यातायात रोकेर सडक विस्तार गरिने भएको छ । यही चैत २७ गतेदेखि चैत ३१ गतेसम्म दिउँसो ४ घण्टा र २०८२ वैशाख १ गते देखि वैशाख १५ गतेसम्म रातको समयमा ६ घण्टा यातायात रोकेर सडक विस्तार गरिने भएकाे हो ।
आज दाउन्नेमा बसेकाे नलपरासी पश्चिम र पूर्वी नवलपरासीका सरोकारवालाहरुको संयुक्त बैठकले यातायात रोकेरै भएपनि दाउन्ने क्षेत्रको सडक विस्तारलाई तीव्रता दिने निर्णय गरेको जिल्ला समन्वय प्रमुख भगउती यादवले जानकारी दिनुभयाे ।
बैठकले दाउन्ने सडकखण्ड तत्काल मर्मत र विस्तार नगरे दुर्घटनाकाे जाेखिम सगैँ आवागमनमा समस्या भई यात्रुले सास्ती बेहाेर्नुपर्ने बाध्यताकाे अन्त्य गर्न सडक मर्मत र विस्तारको कामलाई तिब्रता दिन सम्बन्धित निकायमा सिफारिस गर्ने निर्णय गरेकाे छ।
जस अनुसार चैत २७ देखि ३१ गतेसम्म विहान ११ बजेदेखि दिउँसो ३ बजेसम्म सवारी आवागमन बन्द गरिने छ भने आगामी वैशाख १ देखि पन्ध्र गतेसम्म राति ११ बजेदेखि विहान ५ बजेसम्म अत्यावश्यक बाहेकका सवारी साधन सञ्चालनमा रोक लगाइने भएकाे छ ।
हाल भइरहेको सडक विस्तारका कारण बर्दघाटदेखि दुम्किबाससम्मको १३ किलोमिटर दुरी पार गर्न झण्डै ५÷६ घण्टा लाग्ने गरेको छ । यस्तै बैठकले उक्त सडक खण्डमा सवारी साधन ब्रिगेर सडक अवरुद्ध हुन पुगेमा तत्काल उक्त सवारी साधन हटाइ सडक सुचारु गर्न उपकरण र जनशक्तिसहितको टीम २४ घण्टा तैनाव अवस्थामा राख्ने व्यवस्था मिलाउन आयोजनालाई निर्देशन गरेको छ।