नवलपरासी पश्चिम चैत १९ गते । नवलपरासी पश्चिम स्थित रामग्राम नगरपालिका वडा नं.१८ स्थित प्राचीन बुद्धकालिन स्थल पण्डितपुर क्षेत्रको उत्खनन् पुनः शुरु भएको छ । उक्त क्षेत्रको पुरातत्व विभागको टोलीले पाँच दिनदेखि उत्खनन् गरिरहेको हो ।
यसअघि गरिएको भू–भौतिक सर्वेक्षणबाट प्राप्त पुरातात्विक संरचनाहरुको पुष्टि गर्न अहिले दोस्रो चरणको उत्खनन् थालिएको पुरातत्व विभागका पुरातत्व शाखा प्रमुख भाष्कर ज्ञवालीले जानकारी दिनुभयो । गत मंसिरमा करिब एक महिना लगाएर पहिलो चरणको उत्खनन् गरिएको थियो ।
लुम्बिनी प्रदेश सरकारको आर्थिक सहयोग तथा रामग्राम नगरपालिकाको समन्वयमा अहिले थालिएको उत्खनन् कार्य करिब एक महिना चल्ने ज्ञवालीले बताउनुभयो । जियो फिजिक्स सर्भेले यस क्षेत्रमा बुद्धकालीन प्राचीन शहर रहेको फेला परेको थियो । पहिलो चरणको उत्खननबाट प्राचीन शहरका महत्वपूर्ण भग्नावशेष फेला परेकोले थप संरचनाहरु खोज्न अहिलेको उत्खनन् महत्वपूर्ण हुने विश्वास गरिएको छ ।
अहिले पण्डितपुरको पश्चिमतर्फ पोखरी नजिकै निजी जग्गामा गरिएको उत्खननबाट धनुषवाणमा प्रयोग हुने हाडका हतियार तथा आवाज आउने हड्डीका टुक्राहरु फेला परेका छन् । पूर्वतर्फको बगँैचामा भईरहेको उत्खननमा प्राचीन ईट्टाको पर्खाल जस्तै संरचना भेटिएको छ ।
लामो समयदेखि अध्ययन अनुसन्धान हुँदै आएको यो क्षेत्र बुद्धकालीन कोलिय गणराज्यको राजधानी प्रमाणीत हुने आधारहरु फेला पर्दै आएपनि यसको संरक्षणमा सरकारले ध्यान दिन सकेको छैन् ।