परासी, १७ चैत । भूमि समस्या समाधान आयोगका केन्द्रीय अध्यक्ष हरिप्रसाद रिजालले आगामी तीन वर्षभित्रमा भूमिहीन सुकुम्बासीको समस्या समाधान गर्ने गरी कामलाई तीव्रता दिएको बताउनुभएको छ ।
भूमि समस्या समाधान आयोग नवलपरासी पश्चिमले आज आइतबार परासीमा आयोजना गरेको अभिमुखीकरण कार्यक्रमलाई सम्बोधन गर्दै अध्यक्ष रिजालले आयोगले आगामी २०८४ असोज मसान्त भित्र नेपालमा रहेका सबै भूमिहीन दलित, भूमिहिन सुकुम्बासी तथा अव्यवस्थित बसोबासीलाई जग्गाधनी पूर्जा वितरण गरिसक्ने गरि कार्ययोजना बनाएर अघि बढेको बताउनुभएको हो ।
त्यसका लागि अध्यक्ष रिजालले सक्रियताका साथ निश्पक्ष रुपमा प्रभावकारी ढंगले आयोगको कामलाई अघि बढाउन आयोगको जिल्ला समितिलाई निर्देशन दिनुभएको छ । संविधान उल्लेख गरिएको व्यवस्था अनुसार नै सबै भूमिहीन र सुकुम्बासीलाई जग्गाको मालिक बनाउने उहाँले बताउनुभयो ।
उहाँले स्थानीय तह र जिल्ला आयोगले सक्रियतापूर्वक काम गरेको खण्डमा मात्र आयोगको काम प्रभावकारी हुने र तोकिएको समय भित्रै भूमिहीनलाई जग्गाको मालिक बनाउन सकिने भएकाले त्यसतर्फ सचेत रहन आग्रह गर्नुभयो ।
कार्यक्रममा केन्द्रीय विज्ञ सदस्य डा.जगत बस्नेतले आयोगको कार्यविधि तथा कार्ययोजनाको बारेमा जिल्ला भित्रका सम्पूर्ण पालिकाको जनप्रतिनिधि, राजनीतिक दल तथा कर्मचारीहरुलाई अभिमुखीकरण गर्नुभएको थियो ।