नवलपरासी पश्चिम चैत १४ गते । नवलपरासी पश्चिम स्थित सुनवल नगरपालिकामा करिब दुई सय छाडा तथा भुस्याहा कुकुरलाई बन्ध्याकरण गरिएको छ । एक शिविरको आयोजना गरी सुनवल नगरपालिकाको वडा नम्बर १,२,४,९ र १० का साना तथा ठूला छाडा तथा भुस्याहा कुकुरलाई बन्ध्याकरण गरिएको हो ।
बन्ध्याकरणका लागि युथ फर कन्जरभेसन एण्ड सस्टेनेबल एग्रिकल्चर रुपन्देहीको प्राविधिक टोलीले गए रातिनै जाल थापेर छाडा तथा भुस्याहा कुकुरहरु समातेको थियो । समातिएका कुकुरहरुलाई गाडिमा राखेर सुनवल २ रजहवा स्थित पशु सेवा केन्द्रमा रातभर थुनेर राखिएको सुनवल पशुसेवा शाखा प्रमुख मिश्रीप्रसाद खड्काले जानकारी दिनुभयो ।
सौंयौको संख्यामा रहेका भुस्याहा कुकुरहरुले बिहान पढ्न जाने क्याम्पसका विद्यार्थीहरुलाई टोक्ने, रेविज सार्ने , बाइक र साईकलमा हिड्ने यात्रुलाई झम्टिने गर्दा दुर्घटनाको उच्च जोखिम रहेको थियोे ।
एक्लै बालबालिकाहरु हिड्न डराउने , छाडा कुकुरले जहाँतहि दिशापिसा गर्दा दुर्गन्ध बढ्ने र बातावरण समेत दुषित बन्दै गएपछि भुस्याहा कुकुरको संख्या घटाउने लक्ष्य सहित बन्ध्याकरण शिविर संचालन गरिएको सुनवल नगरप्रमुख विमला अर्यालले जानकारी दिनुभयो ।
सुनवल २ स्थित स्थानिय पहलाद पासि भन्नुहुन्छ “शरिर फुर्तिलो राख्न बिहान बिहान हिड्न मन हुदाहुदै पनि भुस्याहा कुकुरको डरले हिड्न सकिएन” अहिले यो शिविर संचालन गर्दा विस्तारै छाडा कुकुरहरु कम भएर जान्छकी भन्ने आश पलाएको छ ।
त्यस्तै मुखियाटोल निवासी १२ कक्षामा अध्ययरत विद्यार्थी सरोज भट्टराई भन्नुहुन्छ “२ बर्ष हुन लाग्यो सधै कलेज पढ्न जान लाग्यो कतिबेला टोक्ने हो भन्ने डर मनमा भइरहने, चार पाचँजना साथीहरु भएर कलेज जान्छौ ,कहिलेकाहिँ हतार भयो, साथीहरुले छोडेर गएभने म प्राय कलेजै नगई घर बस्छु । ”
हप्तामा एक पटक जस्तो छाडा तथा भुस्याहा कुकुरको समस्या लिएर वडामा स्थानियबासीहरु आउने क्रम बढेपछि यसको निधान गर्न भन्दै शिविर संचालन गरिएको वडा नम्बर २ का वडा अध्यक्ष राजेन्द्र यादवले जानकारी दिनुभयो । आर्थिक वर्ष २०८२ /०८३ मा समेत यस कार्यक्रमलाई निरन्ता दिइने उहाँको भनाई छ ।
नवलपरासी पश्चिमको ३ नगरपालिका र ४ गाउँपालिका मध्ये बर्दघाट नगरपालिकामा मात्र गत बर्ष छाडा तथा भुस्याहा कुकुरलाई बन्ध्याकरण कार्यक्रम संचालन गरिएको थियो । यस आर्थिक वर्षमा पनि यस कार्यक्रम रहेको बर्दघाट पशुसेवा शाखाले जानकारी दिएको छ ।