चैत १४ गते । अर्घाखाँचीकाे शितगंगा नगरपालिका–२ भुवनपाटामा बस दुर्घटनामा परी मृत्यु हुनेको संख्या चार पुगेको छ । अर्घाखाँचीबाट नवलपरासीतर्फ आउदै गरेको लु २ ख ३०३ नम्बरको बस ओरालोमा सडकबाट तल खसेको हाे । प्रहरीका अनुसार मृत्यु हुनेमा नवलपरासी पश्चिम भुमहीका अन्दाजी ४५ वर्षीया उमा न्यौपाने र उनकी सासु ६५ वर्षीया नाम नखुलेकाे रहेका छन् । त्यस्तै पश्चिम बर्दघाट बस्ने वर्ष ५० का बस चालक मदनकुमार विक र रुपन्देही बुटवल उपमहानगरपालिका–८ बस्ने ५५ वर्षीय जमुना बस्याल रहेको प्रहरी निरीक्षक विष्णुप्रसाद पौडेलले जानकारी दिनुभयाे । उनीहरुलाई प्राथमिक स्वास्थ्य केन्द्र ठाडाले मृत घोषणा गरेको हाे  ।
दुर्घटनामा २८ जना यात्रु घाइते भएका छन् । जसमध्ये गम्भीर घाइते हुनेमा नवलपरासी बर्दघाट नगरपालिका १२ बस्ने ३६ वर्षीय सन्तोष कँडेल,३१ वर्षीय आशीष अधिकारी, २७ वर्षीया लक्ष्मी अधिकारी ,१४ वर्षीय आयान्स अधिकारी,४ वर्षीय अमर कँडेल, ४ वर्षीया आन्दा अधिकारीलाई बुटवल रेफर गरिएको प्रहरीले जनाएको छ ।
नवलपरासीबाट बसमा अर्घाखाँची भ्रमण गरेर फर्कंने क्रममम ओरालोमा ब्रेक फेल भएर दुर्घटना भएको हुनसक्ने  प्रहरीले अनुमान गरेको छ ।