नवलपरासी पश्चिम चैत ११ गते । नवलपरासी पश्चिममा ६ महिनामा २ सय १ जना क्षयरोगीका नयाँ बिरामी फेला परेका छन् । विश्व क्षयरोग दिवसको अवसरमा आज सोमबार स्वास्थ्य कार्यालय परासीमा र रामग्राम नगरपालिकाको संयुक्त आयोजनामा भएको सरोकारवालाहरुसगँको अन्तरक्रिया कार्यक्रममा उक्त जानकारी गराईएको थियो ।
स्वास्थ्य कार्यालय परासीले साउन महिना देखि पुससम्म जिल्लामा ६१ वटा संस्थामा गरेको परिक्षणमा २ सय १ जना क्षयरोगी नयाँ बिरामी फेला परेको स्वास्थ्य कार्यालय नवलपरासीका जनस्वास्थ्य अधिकृत जोन मोहम्मद पाठनले जानकारी दिनुभयो । उहाँका अनुसार अघिल्लो बर्ष २०८० /०८१ मा ५ सय १९ क्षयरोगी बिरामी फेला परेका थिए ।
यस आर्थिक बर्ष २०८१/ ०८२ मा सबैभन्दा बढि रामग्राम नगरपालिका मा ४३ जना क्षयरोगीका बिरामी फेला परेका छन् । त्यस्तै सबैभन्दा कम बिरामी सुस्ता गाउँपालिकामा १५ जना क्षयरोगीका बिरामी फेला परेका छन् ।
बर्दघाट नगरपालिकामा ४२ जना, सुनवल नगरपालिकामा ३३ जना, सरावल गाउँपालिकामा २७ जना, पाल्हिनन्दन गाउँपालिकामा २४ जना र प्रतापपुरमा १७ जना क्षयरोगीका बिरामी भेटिएको स्वास्थ्य कार्यालय परासीका प्रमुख भेषराज शर्माले जानकारी दिनुभयो ।
उहाँका अनुसार गत बर्ष २०८० /०८१ मा सुनवल नगरपालिकामा १ सय १३ जना क्षयरोगीका बिरामी, बर्दघाट नगरपालिका १ सय, रामग्राम नगरपाकिामा ८६ जना , सरावल गाउँपालिकामा ५९ , पाल्हीनन्दन गाउँपालिकामा ५८ जना, प्रतापपुरमा ६० जना र सुस्ता गाउँपालिकामा ५३ जना क्षयरोगी बिरामी भेटिएका थिए ।