नवलपरासी पश्चिम चैत्र ६ गते । नवलपरासी पश्चिमको बर्दघाट नगरपालिकाले डाइलाइसिस सेवा सुरु गर्न लागेपछि मिर्गौलापिडित बिरामीहरु उपचारका लागि अन्यत्र जान नपर्ने भएको छ । त्यसकालागि आवश्यक पर्ने मेसिनको व्यवस्था भइ जिल्लामै पहिलो पटक नगरपालिकाले यो सेवा सुरु गर्न लागेको नगरप्रमुख शम्भुलाल श्रेष्ठले जानकारी दिनुभयो ।

डाइलाइसिस सेवा नहुँदा बर्दघाट लगाएत जिल्लाका मिर्गौलापीडित बिरामीहरु उपचारकालागि भरतपुर, बुटवल र भैरहवा जानुपर्ने बाध्यता थियो । बर्दघाट नगरपालिकाबाट मात्र करिब एक सयभन्दा बढी मिर्गौलापीडित बिरामीहरु डाइलाइसिसका लागि अन्यन्त्र जाने गरेको नगरपालिकाले जनाएको छ ।

जर्मन सरकारको सहयोगमा उपलब्ध गराइएको तीन वटा मेसिनलाई स्वास्थ्य मन्त्रालयले नगरपालिकालाई उपलब्ध गराउने छ । सो विषयमा विषयमा तालिमकालागि अस्पतालका स्वास्थ्यकर्मीलाई एक हप्ताभित्र काठमाण्डौँ पठाउन लागिएको नगरप्रमुख श्रेष्ठले बताउनुभयो ।

डाइलाइसिस सेवा चौपतास्थित सामुदायिक अस्पतालमा सुरु हुने छ । “चिसापानी अस्पतालमा ठाउँ अभाव भएकोले सामुदायिक अस्पतालमा सेवा सुरु गर्न लागेका हौ ।” नगर प्रमुख शम्भुलाल श्रेष्ठले भन्नुभयो ।

उहाँ भन्नुहुन्छ “मेसिन ल्याउने सबै प्रकृया पुरा भइसकेको छ । स्वास्थ्यकर्मीहरु तालिम लिएर आउने बित्तिकै १५ दिनभित्र मेसिन ल्याएर जडान सुरु गर्छौ ।”  जडान सकेर काम सुरु हुन एक डेढ महिना लाग्नेछ । डाइलाइसिस सेवा सुरु भएपछि एकै पटक १० देखि १२ जनाले सेवा लिन सक्ने छन् ।