१८ फागुन नवलपरासी ।  सुनवल नगरपालिकामा करिब १२ कराेड ४० लाख लागतमा साेमनाथ खाेला, सितलपानी घाेला र तिलकाना खाेला बक्स पुल निर्माण कार्य शुरू भएकाे छ ।
करिब १६ कराेड अनुमानित लागत रहेकाे पुलकाे २०८१ असार २० गते सम्झाैता भई १२ कराेड ४० लाखकाे हराहारीमा ठेक्का सम्झाैता भएकाे हाे ।
जस अन्तर्गत सनिवार  सडक पूर्वाधार विकास कार्यालय, पश्चिम नवलपरासीले सुनवल नगरपालिका, वडा नं.६ मा संचालनमा रहेको सोमनाथ खोला-तिलकाना खोला र सितलपानी घोला पुल निर्माण आयोजनाको शिलन्यास तथा सार्वजनिक सुनुवाई कार्यक्रम सम्पन्न गर्याे ।
जिल्ला समन्वय समिति प्रमुख भगउती यादवकाे अध्यक्षता तथा लुम्बिनी प्रदेश भाैतिक पुर्वाधार विकाश मन्त्री भुमिश्वर ढकालकाे प्रमुख आतिथ्यतामा विधिवत रूपमा गरिएकाे शिलन्यास कार्यक्रममा पूर्वमन्त्री एवं लुम्बिनी प्रदेश सांसद खड्ग बस्नेत,  सुनवल नगरप्रमुख  विमला अर्याल,नेकपा एमाले जिल्ला कमिटी उपाध्यक्ष डाेलराज भण्डारी लगाएत राजनैतिक दल, जनप्रतिनिधि , विभिन्न संघसंस्थामा आवद्व व्यक्तित्व , स्थानीयबासी लगाएतकाे उपस्थिति रहेकाे थियाे ।
सुनवललाई रिङराेड बनाउने प्रस्ताव सहित निर्माणकार्य सुरू भएकाे याे पुल रूपन्देहीको रामपुर चाैराहाबाट सुनवलकाे ७ नम्बर , ८ नम्बर हुदै अलकत्रे डाडाँबाट मक्षरमारा , बिसासय हुदै बिहारी सम्म जाेड्ने महत्त्वपूर्ण वैकल्पिक बाटाेकाे रूपमा स्थापित हुनेछ ।
भाैतिक पुर्वाधार विकास मन्त्रालय लुम्बिनी प्रदेशकाे लागतमा निर्माणकार्य सुरू भएकाे यस पुलकाे आयाेजना कार्यान्वयन  सडक पुर्वाधार विकास कार्यालय पश्चिम नवलपरासीकाे रहने छ भने स्थानीय सडक पुल सहयाेग इकाईकाे प्राविधिक निरिक्षण रहनेछ ।
साेहि क्रममा बाेल्दै लुम्बिनी प्रदेश भाैतिक पुर्वाधार विकाश मन्त्री भुमिश्वर ढकालले दुई बर्षमा सक्ने प्रदेश सरकारकाे याेजनालाई अब निर्माण व्यवसायी र जनताले सुनिश्चित गर्नुपर्ने सुझाव दिनुभयाे ।
पुल निमार्णमा प्रयाेग हुने सामाग्री सम्झाैता अनुरूप भएनभएकाे हेर्ने र निर्माण व्यवसायीलाई जवाफदेही बनाउन सम्बन्धित सराेकारवालाहरू सचेत हुन आग्रह गर्दै बजेट अपुग भएका कारणले आयाेजना विचमा अलपत्र नहुने प्रतिबद्धता व्यक्त गर्नुभयाे ।
कतिपय निर्माण व्यवसायीकाे ढिलासुस्तीले थुप्रै आयाेजनामा समयमा सम्पन्न नहुदा पटक पटक सरकारकाे आलाेचना हुने गरेकाे भन्दै त्यसतर्फ सचेत रहन सम्बन्धित पक्षलाई सुझाव दिनुभयाे ।
त्यसैगरी जिल्ला समन्वय प्रमुख भगउती यादवले निर्माण कार्यलाई समयमै सम्पन्न गर्न जिल्ला समन्वय समितिकाे सिंगाे टिमले बेला बेलामा अनुगमन गर्ने प्रतिबद्धता व्यक्त गर्नुभयाे ।
यसैबीच सुनवल नगरप्रमुख अर्यालले ढिलै भएपनि सबेैकाे सकारात्मक प्रयासले पुन शिलान्यास गर्न सफल भएकाेमा खुसी व्यक्त गर्दै पारदर्शिता , मितव्ययीता र गुणस्तरमा ध्यान दिन निर्माण व्यवसायीलाई आग्रह गर्नुभयाे ।
साेहि क्रममा निर्माण व्यवसायीकाे तर्फबाट नरप्रसाद सेरचनले दुइ बर्षभित्र पुल निर्माणकार्य सम्पन्न गर्ने भनी गरिएकाे  ठेक्का सम्झाैता अनुरूप बजेटमा ढिलाइ नभए समयमै काम सम्पन्न गर्ने प्रतिबद्धता व्यक्त गर्नुभयाे ।
हिमा बेलबासेकाे संचालन र वडा नम्बर ६ का वडा अध्यक्ष हेमलाल शर्मा चापागाईंकाे स्वागत रहेकाे कार्यक्रममा नेकपा एमाले जिल्ला उपाध्यक्ष डाेलराज भण्डारी , जिल्ला सहकारी संघका अध्यक्ष विष्णु प्रसाद पाैडेल लगाएतले शुभकामना मन्तव्य  व्यक्त गर्नुभएकाे थियाे ।