प्रदिप न्यौपाने । धनगढी । नेपालमा भारतीय रुपैयाँ एक सयभन्दा ठूला नोटको कारोबारमा प्रतिबन्ध लगाएको छ। राष्ट्र बैंकले वित्तीय चेतनाका लागि भन्दै मंगलबार जारी गरेको सूचनामा भारतीय रुपैयाँ एक सय दरभन्दा ठूला नोट साथमा राख्न, ओसरपसार गर्न र कारोबार गर्न प्रतिबिन्धत लगाइएको उल्लेख छ।यस्तै, भारतबाट नेपाल आउने वा नेपालबाट भारत जाँदा अमेरिकी डलर ५ हजार बराबरको भारतीय रुपैयाँ मात्रै लैजान सकिने पनि राष्ट्रबैंकले जनाएको छ। त्यसरी लैजाने वा ल्याउने नोट पनि सय भन्दा ठूला नोट हुन नहुने व्यवस्था गरिएको छ। पाँच हजार डलर भन्दा बढीको भारतीय रुपैयाँल्याउन लैजान परेमा भन्सारमा घोषणा गर्नुपर्ने छ।
भारत भ्रमण जानेहरुका लागि बैंक तथा वित्तिय संस्थाबाटै भारतीय रुपैयाँ २५ हजारसम्म र औषधोपचारका लागि भारतीय रुपैयाँ ५० हजारसम्मको सटही सुविधा लिन सकिने पनि राष्ट्रबैंकले जनाएको छ। ड्राफ्ट, टीटी, कार्डमार्फत हुने भुक्तानीमा भने यो सीमा लागू नहुने राष्ट्र बैंकले जनाएको छ।