टिकटक बन्द गर्ने सरकारको निणर्य विरुद्ध सर्वोच्च अदालतमा कम्तिमा पनि ६ वटा रिट निवेदन पेश भएका छन् । तिहार बिदापछि अदालत खुलेको पहिलो दिन कानून व्यवसायीहरुले सरकारको निणर्यमाथि चुनौती दिई रिट निवेदनहरु पेश गरेका हुन् ।
सर्वोच्च अदालतका प्रवक्ता भद्रकाली पोखरेलले अहिलेसम्म ६ वटा रिट निवेदनहरु पेश भएको बताउँदै ती निवेदन सरसर्ती पढेर रुजु गर्ने प्रक्रियामा जाने बताउनुभयो । बरिष्ठ अधिवक्ता दिनेश त्रिपाठी, अधिवक्ता स्वागत नेपाल लगायतले छुट्टाछुट्टै रिट निवेदन पेश गरेका हुन् ।
टिकटक माथिको प्रतिबन्धले नागरिकको विचार तथा अभिव्यक्ति स्वतन्त्रता हनन भएको, निर्देशिका ल्याएर नियमन गर्ने प्रक्रियामा गएको सरकारले हठात बन्द गर्ने निणर्य गरेको, निणर्य गर्दा कुनै कानूनी आधार नटेकेको भन्दै उनीहरुले सरकारको निणर्य खारेज हुनुपर्ने माग गरेका छन् । नागरिकका लागि अपूरणीय क्षति हुने भन्दै उनीहरुले आफूहरुको निवेदनमा अन्तरिम आदेश जारी हुनुपर्ने माग समेत गरेका छन् ।
२७ कात्तिकको मन्त्रिपरिषद बैठकले सामाजिक सञ्जाल टिकटक बन्द गर्ने निणर्य गरेको थियो । टिकटकबाट पारिवारिक सम्बन्ध र सामाजिक सद्भाव बिगार्ने काम भएको भन्दै त्यसलाई बन्द गर्ने निणर्य सरकारले गरेको हो ।स्रोतःअनलाइनखबर